Qalinjabisaye
Maxaa Xiga?!
Suuqa Shaqo
la'aanta, oo markii horeba xaami ahaa, maanta waxa ku soo biiray kun iyo
dheeraad kale. Kumannaan kalena bishan iyo
bilaha soo socda ayay ku soo biiri doonaan. Soo dhowaada, soo Dhowaada,
Soo dhowaada. Ku soo dhowaada suuqa shaqo raadinta intiinna aan shaqayneey. Ku
soo dhowaada, masuuliyado aan hore kuu saarnayn in ay maanta laga bilaabo ku
fuulaan.Qoys iyo qaraabo mudda badan ku soo maalgashanayay, ayaa maanta raba in
ay ku maalaan. Waxaad is odhanaysaa, dadkeennu jaamacadda waxay u haystaan meel
marka la dhammeeyo si mucjiso ah shaqo loo helo, waana sababta ay ula yaabi
karaan adiga oo jaamacad dhammeeyay in aad ku tidhaahdid bilaa camal ayaan
ahay. Iska dulqaado
hawlahaa
jaamacaddaa wadata e. Lol
Xaqiiqada
waddanka taallaa, waa mid laga wada dheragsanyahay, oo qofna loo sheegi maayo.
Waad aragtaan heerka ay shaqo la'aantu marayso. Waxa kale oo aad la socotaan in
aan la tixgelin aqoonta iyo xirfadda aad baratay, balse mudnaanta la siiyo ina
Hebel iyo CV-ga wareega —waa suldaannada iyo caaqillada e. Mid kale oo ka sii
daran baa jirta, waana ardaydii sannadihii hore jaamacada dhammeeyay oo aan
weli helin shaqo macno lahe, amaba aan shaqaynba. Waana xaqiiqo aan la iska
indhotiri karine, taana maanka ha lagu hayo.
Sidaas oo ay
tahay, waxa jira fursado kale oo muhiim ah, kuwaas oo haddii laga faa'iidaysto,
lagu dabooli karo waajibaadka nolosha. Dhowrkan qodob ayaan talo
ahaan ila qurux
badan in uu raaco ardayga soo qalinjabiyay ee bilaa camalka ahi.
1. Marnaba ha
sugin in xukuumaddu shaqo iska kaa siiso, iyadoo la tixgelinayo aqoontaada iyo
xirfaddaada, taa macneheedu maaha dhankaa ha eegin, balse isku hallayn buuxda
ha siinnin si aanu wakhtigu kaaga lumin shaqo-sugid.
2. Muhiim ma
aha, in aad ku shaqaysid wixii aad soo baratay oo keliya, balse shaqo kasta oo
aad qaban karto qabo, mushaharkeedu haba yaraado e.
3. Farsamada
gacanta baro, waana meelaha ugu fiican ee shaqo laga helo, sidoo kalena si
madax bannaan aad ugu shaqaysan kartide.
4. Xilligan la
joogo, ee ay Tiknoolajiyaddu aad u hano qaadday, waxa aad looga faa'iidaystay
suuqa internetka oo si weyn looga faa'iidaysan karo, adiga oo wax ku
iibin kara
barahaaga bulshada. Waana meel aan takaaliif badan kaaga baahnayn, si xor ahna
aad ugu shaqaysan kartid. Waxana la odhan karaa suuqa internetku, waa suuq weli
dihin oo aynaan weli waxba ka baran baaxadda uu leeyahay. Si gaar ah ha loo ogaado .
5. Waxa muhiim
ah in uu qofka iska ilaaliyo goobaha fadhi-ku-dirirka ah, taasi aan wax dheef
ah u soo kordhinayn arday soo qalinjabiyay.
6. Waxa dhici
karta in aadan bilawga horeba shaqo helin, balse sida aad halgan u gashid ayaa
ka jawaabi doona halka aad u socotid.
7. Fursadda
shaqo heliddu ma badna. Gaar ahaan dumarku ma helaan fursadda ay raggu helaan,
taa baddalkeeda, habluhu waxay heli karaa fursado badan oo ka
bannaan
kaalinta shaqo ee dumarka u gaarka ah,
hadday halabuur ganacsi noqoto iyo hadday adeeg la bixiyo noqotaba.
8. Ganacsigu
waa waxyaabaha ugu muhiimsan ee qofku isagoo xorriyad dareemaya uu shaqaysan
karo. Waxa dhici karta, arday maanta soo qalinjabiyay in aanu haysan hanti
badan oo uu ku bilaabo ganacsi. Waxaan aaminsanahay haddii ay qofka ka
go'antahay in uu ganacsi yar bilaabo, in uu ku bilaabi karo lacag aan badnayn
sida $50, $100 ama $200, amaahba aad ku heshide, waxa hubaal ah in ay noqon
doonto wax aad ku liibaantid.
9. Halabuur
shaqo aan hore u jirin waa waxyabaha ugu muhiimsan ee halabuuraha iyo
bulshaduba ka faa'idi karaan. Rag iyo dumarba, ha la isku dayo
in lala
yimaaddo halabuur shaqo, kaasi aan waddanka ama magaalada hore uga jirin.
10. Fursadaha
shaqo ee bannaan, balse aan lagu baraarugsanayn aad iyo aad ayay u badanyihiin.
Qofku isaga oo aan halabuur cusub la iman, waxa uu samayn karaa shaqooyin iyo
ganacsiyo hore u jiray balse qaab qadiimi ah dadka loogu adeego, ayuu casriyayn
karaa, oo uu la jaanqaadsiin karaa Tiknoolajiyadda, isaga oo soo kordhinaya hab
cusub oo ka fudud sidii hore loogu qaban jirey.
11. Haddii aad
jaamacadda dhammaysay, kama dhigna in aad tahay khabiir aan lagaga daba dhufan.
Waxa se waajib kugu ah in aad aqoontaada
iyo xirfaddaada kobciso, si aad waajibaadka nolosha u gudatid.
Garashana
ogsoonoow, inay xaajo badan goyso.
—Hadraawi AHN.
W\Q: Cabdicasis imaan
إرسال تعليق